A Polo Ghit

Já vo-lo dizia o outro dia. O projecto Mourente apresenta "Chuliboy" ao A Polo Ghit deste ano. Até agora só hai seis temas para votar. Para votardes no tema do Projecto Mourente ou dos outros grupos, tedes que vos registrar em Vieiros (se é que ainda nom o figestes). Veremos em que acaba a cousa, pero o certo é que começamos bem. E continuando com Vieiros, sai hoje uma ampla entrevista em vários vídeos gravados aqui no meu quarto. Os primeiros planos som sempre implacáveis e esmagadores, pero penso que a cousa saiu simpática. Obrigado à equipa vieirã. Se queredes ver como saiu, clicade aqui. E uma pequena pontualizaçom, quando digo que os galegofalantes tinham ganas de fazer festa e bailar no seu idioma, refiro-me à música disco ou dance. Afortunadamente, os galegofalantes levamos séculos fazendo boas festas coa nossa música tradicional, pero também com ska, com hardcore... e todo na nossa língua. Feita esta necessária aclaraçom, ponho o "Dvno" dos Justice, uns verdadeiros mestres, como exemplo paradigmático do dance actual. Som franceses, bien sûr!

Já chegárom os cds!

Sem tempo nom foi. Já tenho na casa os cds e agora começa uma nova fase em toda esta história: a distribuiçom. Para isso contaremos coa Lonxa Cultural, que se encarregará de pôr o "Kara.o.ke" nos comércios. Isso será daqui aos inícios de junho. Com todo, desde que se lançou na rede a meados deste mês, no site da Regueifa já se recebêrom várias comandas. O ritmo das descargas também vai bem (hai uma semana já passavam as 900 do álbum todo) assi que estou feliz. E mais feliz ainda com todas essas mensagens dando parabéns e muito apoio ao Projecto. Obrigado a todos.

Uma das cousas que tem lançar um álbum, ainda que seja caseiro, é o de conceder entrevistas para o promocionar, especialmente se também sai em formato cd. Em geral, divirto-me bastante fazendo-as, ainda que às vezes boto a língua a pacer um pouco de mais. Julgade vós mesmos lendo a reportagem em El País e as entrevistas em GZNacion e Radiofusión. Também dêrom notícias no MeGa e em Vieiros. Também sobre "Kara.o.ke" escreve em Novas da Galiza (pág.17) o Noel Feáns, uma das metades de F&A que masterizou o álbum e mesmo tocou a guitarra em "Vamos queimar Paris". E haverá mais, já vos irei contando.
E antes de vos deixar co vídeo de hoje, "Outro futuro" de Balla, lembro-vos que o Projecto Mourente volta ao A Polo Ghit com "Chuliboy". Para comentardes ou mesmo votardes no tema, clicade aqui. A minha cançom favorita das outras cinco candidatas iniciais é a de Magín Blanco & Burgas Beat "Canto de serea". Realmente bonita.

Eurovisom 2008

Nom, nom esquecim que estamos na semana eurovisiva. O bom deste ano é que temos duas semifinais, para além da final do próximo sábado. Na primeira semifinal já caiu Andorra (uma das minhas favoritas), pero, graças ao apoio bloco nórdico, passou Noruega. Ainda bom foi. Os resultados... pois fôrom os que a estrategia de blocos nos dam sempre. Hoje é a segunda semifinal... e a RTVE nom a vai emitir. É uma decisom da organizaçom do festival: os do Big Four nom podem votar em todas as semifinais e à Espanha tocou-lhe votar só na primeira. Isto significa que: 1. terei que ver a semifinal de hoje por internet e... 2. Nom poderei votar por Portugal, o qual me indigna profundamente.
Estando como estám as cousas, sem o apoio das grandes audiências da Europa ocidental, vai ser ainda mais difícil que Portugal chegue à final. Para quem nom o tiver claro ainda, em Eurovisom já nom se vota na melhor cançom de qualquer país, senom na melhor cançom do bloco em que se encontra o nosso país. Na actualidade, já se tenhem bem definidos e identificados três blocos principais: o soviético (liderado por Rússia e integrado polas antigas repúblicas da URSS), o balcánico (coas antigas repúblicas jugoslavas, Hungria, Albánia, Romênia e Bulgária) e o nórdico-báltico (Noruega, Suécia, Dinamarca, Finlándia, Islándia e os países bálticos). Também se está a conformar um bloco mediterráneo (Chipre, Grécia, Malta e Turquia), que às vezes se alia co balcánico. E que acontece cos países da Europa ocidental? Pois que nom conformárom bloco nengum, o que fai que desde hai anos nom ganhem o festival. Eu tenho-o claro: votar por Portugal e pola melhor cançom da Europa ocidental (Fráncia, Alemanha, Reino Unido, Irlanda, Bélgica, Países Baixos, Andorra...). Este ano já ficárom fóra Bélgica, Países Baixos e Andorra. Hoje será difícil que passem Portugal e os outros. Veremos. Pero no sábado votarei na França e no Reino Unido. E vós? Deixo-vos coa cançom da França, representada polo mesmíssimo Sébastien Tellier (qualité total). E lembrade que haverá uma grande festa na Gentalha do Pichel!

Vilagarcia ou Compostela?

Eu tenho-o claro. Apesar de haver boa festa em Vilagarcia, eu fico em Compostela neste fim de semana das Letras Galegas. A ver nom nos chove para a festa do sábado e, sobretodo, para a manifestaçom do domingo. Vemo-nos alô! Deixo-vos com um vídeo do último trabalho dos Fanny & Alexander, "Amei-te tanto".

Já o podedes descarregar

"Kara.o.ke" já está ao vosso dispor na rede. Para o descarregar, no sítio de sempre, na Regueifa. Na realidade nom está todo, "Por adiante e por atrás" só irá no cd e o remix de Colectivo Oruga também é diferente. Ademais, no libreto do cd irám as fotos que nos tirou a Pícara. O cd estará na rua a inícios de junho. Às nossas mãos chegará um pouco antes, assi que já podedes fazer as vossas comandas. O que tedes acima é o libreto virtual, onde podedes ver as letras e os créditos do álbum. E o que tedes abaixo... é o fantástico clip de The Homens. Aproveito que falo deles, que colaborárom em "Kara.o.ke", para agradecer-lhes a todas as persoas que participárom no álbum o seu apoio e, sobretodo, fazer-me passar momentos tam divertidos. A ver se repetimos! Para eles, dedicado este "Calamar".

Os piores inimigos

Chegou o dia, chegou a romaria! Aqui vos deixo o primeiro clip que montei para "Kara.o.ke". Esta feito para "Os piores inimigos", a novena pista do disco, a partir da curtametragem alemã "Kopfsache", de Palingen Pictures. Espero que gostedes! Ah! E se dades um passeínho polo myspace, poderedes escuitar outros cinco temas do álbum. Todo com tal de mitigar a vossa impaciência ou curiosidade.

Na fábrica

Nom, nom... nom desaparecim. É só que andei enleado cos últimos detalhes da ediçom do disco. "Kara.o.ke" já está caminho da indómita Euskadi. Alô, em Barakaldo, é onde se farám as cópias durante os próximos dias. Se todo vai bem, deveriam chegar-nos a meados de mês. Antes de acabar maio todos deveríades poder ter a vossa cópia. A imagem de hoje é a portada do cd, sobre as cores que escolhim redefinim também o desenho do blog (dentro dos meus curtos conhecimentos na matéria, claro está). Espero que nom vos resulte incómodo de ler. Do que se tratava era de reviver um pouco os tempos do acid house, aquel inesquecível 1989. Assi e todo, a música do disco nom é acid house, nem sequer house, é... o de sempre: pop electrónico feito espontaneamente na casa para bailar e botar umas risadas. O disco terá 15 pistas: 11 temas novos, a versom do "Non podo máis" dos The Homens, e três remixes (geniais, por certo) feitos por Cable, Fanny & Alexander e Colectivo Oruga. Todos os temas estarám também na Regueifa Plataforma em descarga gratuíta. Todos? Nom, nom todos: "Por adiante e por atrás" estará só no disco e o remix de Colectivo Oruga será diferente na web. Os temas lançarám-se na rede aproximadamente duas semanas depois da saída do cd ao mercado. Da distribuiçom encarregará-se a Lonxa Cultural. E quais serám os preços? Pois oscilarám em funçom do lugar de venda, como todo, pero suponho que andarám entre os 10 e os 13 euros.
E enquanto aguardamos (eu som o primeiro impaciente!), um vídeo do Funkerman, "Speed Up".